VKB LANDBOU BEPERK (“VKB”)

GRAANOPBERGINGS- EN HANTERINGSVOORWAARDES

1. INLEIDING EN OOREENKOMS:

1.1         
Hierdie dokument stel die standaard voorwaardes daar
waaronder alle graan en oliesade (“produkte”) hanteer en opgeberg sal word in
die silos van VKB LANDBOU BPK (“VKB”). 
Indien die klant produkte aan VKB lewer of produkte in die silo’s
aankoop, kom die volgende ooreenkoms, hierna genoem (“die voorwaardes”), tussen
VKB en die klant tot stand.

1.2         
Die klant stem in tot hierdie voorwaardes op een of meer
van die volgende wyses:

1.2.1        
Deur ondertekening daarvan aan die einde van hierdie
dokument;

1.2.2        
Deur ondertekening van VKB se kredietvoorwaardes, welke
sodanige instemming bevat;

1.2.3        
Deur ondertekening van VKB se verkoopsvoorwaardes en/of
aansoek om lidmaatskap, welke sodanige instemming bevat; en/of

1.2.4        
Deur ondertekening en/of aanvaarding van enige
dokumentasie wat deel vorm van die opbergingsketting, insluitend maar nie
beperk tot leweringsopdragte; ontvangsbewyse; silo-sertifikate; aankoopskontrakte;
versendingsdokumente; omsendskrywes, oesreëlings en openbare kennisgewing,
waarin hierdie voorwaardes by wyse van verwysing geinkorporeer word.

1.3         
Dit is egter nie ʼn geldigheidsvereiste vir hierdie
voorwaardes dat dit deur die klant onderteken moet word nie.

1.4         
Afskrifte van die voorwaardes is aan alle klante wat produkte
by VKB opberg of wil opberg kosteloos by die hoofkantoor van VKB beskikbaar.  Dit word op versoek van die klant gestuur per
voorafbetaalde aangetekende pos, per faksimilee, deur middel van die internet
of per hand afgelewer na gelang van die besonderhede wat VKB van die klant het.
Dit is ook by VKB se silo’s en op VKB se
webtuiste, www.vkb.co.za,  beskikbaar.

1.5         
Hierdie voorwaardes word derhalwe by elke opbergingstransaksie
geïnkorporeer deur verwysing.

2. PLEK VAN LEWERING EN OPBERGING:

2.1         
Die produkte moet deur die klant aan VKB gelewer word by ʼn
silo waar VKB dit sal opberg onderworpe aan die beskikbaarheid van voldoende
ruimte vir die betrokke produk en/of graad.

2.2         
Onderworpe aan hierdie voorwaardes onderneem VKB om die
produkte op te berg totdat dit later in opdrag van die klant in geheel of
gedeeltelik oorgedra word na ʼn silo-sertifikaat, ʼn derde of aan VKB verkoop
word, of versend moet word aan ʼn derde.

2.3         
By lewering van die produkte in die silo van VKB gaan die
risiko ten opsigte daarvan op VKB oor. 
Die risiko eindig sodra die produk uit die silo gelaai word.

2.4         
Die klant moet vir doeleindes van elke lewering van
graan, VKB se leweringsopdrag voltooi en onderteken.  Die klant sal gebonde wees aan enige sodanige
leweringsopdrag en die besonderhede daarop voltooi.  Deur die verteenwoordiger toe te laat om die
dokument te voltooi en/of te onderteken en/of om die produk in te lewer,
bevestig die klant die volmag van die verteenwoordiger wat die leweringsopdrag
voltooi en/of onderteken en/of die produk inlewer.

3. TYDPERK VAN OPBERGING:

Die maksimum tydperk van
opberging van elke produk hieronder aangedui is een jaar wat vir elke produk
strek oor die volgende tydperke:

mielies:             1
Mei – 30 April of gedeelte daarvan;

sonneblom:     1
Februarie tot 31 Januarie of gedeelte daarvan;

koring:             1 Oktober tot 30 September of
gedeelte daarvan;

sojabone:        1 Maart
tot 28 Februarie of gedeelte daarvan;

sorghum:         1
April tot 31 Maart of gedeelte daarvan;

droë
bone:      1
Maart tot 28 Februarie of gedeelte daarvan.

4. KWALITEITSBEPALING:

4.1.       
Die kwaliteit van die produk word tydens ontvangs en
versending daarvan deur VKB bepaal op grond van die graderingsregulasies vir
elke produk soos bepaal deur die Wet op Landbouprodukstandaarde 119 van 1980 en
soos wat dit van tyd tot tyd gewysig word.

4.2.       
Indien die kwaliteit van die produk wat deur die klant
gelewer word nie aan die voorgeskrewe vereistes van die betrokke produk voldoen
nie, kan VKB in sy uitsluitlike diskresie besluit of sodanige produk ingevolge
hierdie ooreenkoms opgeberg kan word, welke diskresie op redelike wyse
uitgeoefen sal word.

4.3.       
VKB se gradering word as prima facie korrek aanvaar,
tensy die klant dit onverwyld betwis, in welke geval die dispuut deur ʼn onafhanklike
arbiter op summiere wyse besleg sal word. 
Indien die partye nie kan ooreenkom oor die identiteit van hierdie arbiter
nie, sal die Hoofbestuurder van Graan Suid-Afrika as arbiter optree of iemand
deur laasgenoemde aangewys.

4.4.       
Die klant waarborg dat produkte wat vir opberging by VKB
gelewer word, geproduseer en hanteer is volgens die vereistes van die Wet op
Misstowwe, Veevoedsel, Landboumiddels en Veemiddels 36 van 1947, soos gewysig,
en die Wet op Voedingsmiddels, Skoonheidsmiddels en Ontsmettingsmiddels 54 van
1972, soos gewysig en waar van toepassing. 
Hierdie wette vereis dat produkte slegs met wettige chemiese middels,
volgens voorskrifte behandel is en dus geskik is vir menslike en dierlike
gebruik.

5. MASSABEPALING:

5.1.       
VKB bepaal die massa van elke vrag wat deur die klant
gelewer word of namens die klant versend of uitgelaai word deur gebruik te maak
van ʼn geykte massameter soos gesertifiseer ingevolge die Wet op
Handelsmetrologie 77 van 1973 deur behoorlik gemagtigde owerhede en/of instellings.

5.2.       
Die massabepaling soos aangetoon op die
graanontvangsbewys of uitlaaibewys, word deur die klant as prima facie korrek
en finaal aanvaar tensy die klant, op wie die bewyslas sal rus, die teendeel
bewys.

5.3.       
Indien die vog van die produk met lewering hoër is as die
basisvog, word die opbergmassa verder aangesuiwer na die basisvog waarteen die
onderskeie produkte opgeberg word.   Die
basisvog vir die verskillende produkte is soos volg:

Mielies: 12,5%    Koring: 12,5%    Sojabone: 12,0%    Sorghum: 12,5%    Sonneblom: 9,0%

5.4.       
Indien die vog van die produk bokant die basisvog is en
VKB instem om sodanige produk te ontvang, onderhewig aan droging, sal die koste
van droging vir die rekening van die klant wees.

6. OPBERGING:

Die klant stem toe dat sy
produkte vermeng kan word met produkte van ongeveer dieselfde aard en
kwaliteit.  VKB se verpligting is beperk
daartoe om sover as prakties moontlik produkte van ongeveer dieselfde aard en
kwaliteit te lewer wanneer die opbergingsooreenkoms tot ʼn einde kom.  Hierdie verpligting word nie so uitgelê dat
dit beteken dat identiese produkte teruggelewer moet word nie.

7. VERSEKERING:

7.1.       
VKB onderneem om op sy eie koste die produkte saam met
enige ander produkte wat in die silo opgeberg word te verseker teen
versekerbare risiko’s.

7.2.       
Indien vir watter rede ookal die produkte in die silo tot
so ‘n mate beskadig of vernietig word dat dit onmoontlik is vir VKB om uit
daardie silo of enige ander silo sy voormelde leweringsverpligting na te kom,
is VKB geregtig om in sy uitsluitlike diskresie die waarde van die produkte aan
die klant uit te betaal.  Die waarde word
bereken teen die SAFEX prys min die vervoerdifferensiaal vir die betrokke silo
op die dag waarop VKB in sy uitsluitlike diskresie besluit dat dit onmoontlik
geword het om sy voormelde leweringsverpligting na te kom.  Indien die produk nie op SAFEX verhandel nie
moet die partye bona fide poog om op die kontantwaarde ooreen te kom, by
gebreke waarvan die Hoofbestuurder van Graan Suid-Afrika of iemand deur hom
aangewys gevra word om as ‘n waardeerder, die kontantwaarde in sy diskresie vas
te stel en welke beslissing finaal en bindend sal wees.

7.3.       
Alle diskresies ingevolge hierdie klousule sal op
redelike wyse deur VKB uitgeoefen word.

7.4.       
Die partye bevestig dat ten einde die koste van VKB se
dienste vir die klant te beperk, VKB onder geen omstandighede en vir watter
rede ook al aanspreeklik sal wees vir die kliënt se gevolgskade nie.

7.5.       
VKB mag enige stappe doen wat in sy diskresie nodig is om
die produk te beskerm teen enige moontlike skade wat dit mag tref.

8. VERSENDING

8.1.       
Onttrekking van produkte geskied na minstens tien
werksdae vooraf skriftelike kennisgewing aan VKB met vermelding van die graad,
benaderde massa, versendingsdatum en tyd, versendingsadres en vervoerreëlings.

8.2.       
Alle produkte word op die basis ex-silo aan die klant versend
eers nadat alle vergoeding betaalbaar ingevolge hierdie voorwaardes, deur die
klant betaal is.

8.3.       
Geen produkte mag onttrek word sonder ‘n geldige instruksie
deur VKB uitgereik is nie.

8.4.       
Indien die gradering en spesifikasie van die produk wat
deur VKB aan of namens die klant versend word, verskil van dié van die produk
wat aanvanklik deur die klant vir opberging gelewer is, sal VKB in hulle
diskresie, welke diskresie op redelike wyse uitgeoefen moet word en na
konsultasie met die klant, geregtig wees om ander produkte so na as prakties
moontlik aan die aanvanklike gradering en spesifikasie te lewer.  In sodanige geval sal die klant aan VKB of
VKB aan die klant, na gelang van die geval, vergoeding betaal volgens die
waardeverskille tussen die grade soos deur Safex bepaal  of wat tussen die klant en VKB by wyse van
onderhandeling ooreengekom word en indien hulle nie aldus kan ooreenkom nie,
sal die waardeverskil bepaal word deur die Hoofbestuurder van Graan
Suid-Afrika, of iemand deur hom aangewys.

8.5.       
Indien die produk wat deur die klant ontvang word, nie
ooreenkom met die graad (met inagneming van dit hierbo genoem), massa of
voginhoud soos aan hom versend nie of indien dit insekbesmet is, moet die klant
VKB in kennis stel en nie die produk aflaai nie.  Telefoniese sowel as skriftelike kennisgewing
moet binne 24 uur na aankoms van die produk by die klant, VKB bereik, by
gebreke waarvan die klant verplig sal wees om die produk te aanvaar asof dit
gelewer is soos versend.  Waar naweke of
publieke vakansiedae van toepassing is, moet kennisgewing binne 48 uur geskied.

8.6.       
Ten opsigte van die inhoud van klousule 8.5 bevestig die
partye dat weens die aard van produkte wat hulle afsonderlik identiteit en potensieel
eiendomsreg by vermenging verloor, asook weens die verskeidenheid van
omstandighede wat ʼn nadelige effek op hierdie natuurlike produkte mag hê, dit
noodsaaklik en redelik is om die kennisgewingtydperke so kort as moontlik te
maak.

9. VERGOEDING:

9.1.       
As vergoeding vir die diens wat VKB aan die klant lewer,
sal die klant ʼn tarief vir hantering en/of vir opberging en/of ander
dienstefooie, wat van tyd tot tyd gewysig kan word, aan VKB betaal.  Die tariewe is by die VKB Hoofkantoor beskikbaar.

9.2.       
Die vergoedingstarief sluit in alle gevalle Belasting op
Toegevoegde Waarde (BTW) uit.

9.3.       
Opbergingskoste is betaalbaar binne een maand wat volg op
die maand waarin die opbergingskoste ontstaan het.

9.4.       
Opbergingskoste ten opsigte van silo-sertifikate wat
gestort word is onmiddellik betaalbaar waarna verdere opbergingskoste op die
produk in terme van klousule 9.3 betaalbaar is.

9.5.       
Alle ander silo dienstekostes, administratiewe- en silo-sertifikaatkostes
is betaalbaar binne 3 (drie) dae nadat VKB die klant voorsien het van ʼn
oorspronklike faktuur, of soos andersins skriftelik ooreengekom.

9.6.       
Rente teen ABSA se heersende prima uitleenkoers plus 3
(drie) persentasie punte word op ʼn daaglikse basis op uitstaande en
agterstallige rekenings bereken en maandeliks gekapitaliseer.

9.7.       
VKB oefen ʼn retensiereg op alle produkte wat in die silo’s
opgeberg word uit vir die betaling van alle bedrae verskuldig deur die klant
aan VKB.  VKB behou die reg voor om
lewering van die produkte aan enige iemand hoegenaamd te weier en te weerhou
totdat effektiewe betaling van alle verskuldigde bedrae aan VKB ten opsigte van
die produkte gemaak is.  Die klant magtig
VKB hiermee onherroeplik en onvoorwaardelik om die produkte of soveel daarvan
as wat nodig mag wees te gelde te maak, hetsy deur dit te verkoop of vir eie
rekening aan te koop teen die SAFEX prys min die vervoerdifferensiaal vir die
betrokke silo op die dag waarop die produk aldus te gelde gemaak word.  VKB onderneem om nie hierdie reg uit te oefen
voor die verloop van 10 dae nadat die betrokke verskuldigde bedrag opeisbaar
geword het nie en die klant vir betaling daarvan skriftelik aangemaan is, asook
nadat ʼn behoorlike regsproses gevolg is.

9.8.       
’n Sertifikaat geteken deur  enige bestuurder van VKB (waarvan die
aanstelling nie bewys hoef te word nie) waarin die bedrag verskuldig en
betaalbaar gesertifiseer word, is prima facie bewys van die bedrag en
verskuldigheid.

10. BETALING:

Betaling van enige
verskuldigde bedrag deur die klant aan VKB geskied slegs deurdat die
verskuldigde bedrag betaal word in en gekrediteer word op VKB se bankrekening
te Reitz.  Indien betaling by wyse van
bankoorplasing of deur die internetbankdiens geskied is dit die klant se plig
om VKB van sodanige betaling in kennis te stel per faksimilee by nommer 058 8633317.

11. SILO-SERTIFIKATE:

ʼn Silo-sertifikaat(e) sal deur
VKB aan die klant of sy skriftelik genomineerde uitgereik word twee dae nadat ʼn
skriftelike aansoek daarvoor van die klant ontvang is by VKB se hoofkantoor en
nadat alle verskuldigde gelde ingevolge hiervan betaal is.

12. VERVREEMDING AAN DERDES:

Indien die klant die produkte
of enige deel daarvan aan ʼn derde vervreem sal VKB sy rekords wat op die
produkte betrekking het verander om die derde as die klant ten opsigte van die
produkte te reflekteer, slegs indien VKB ʼn skriftelike aansoek daarvoor by VKB
se hoofkantoor ontvang, behoorlik onderteken deur die klant.  Die derde is eweneens aan hierdie voorwaardes
gebonde.

13. KENNISGEWINGS:

VKB kies President CR Swartstraat 31, Reitz as die
adres waar alle kennisgewings ingevolge hierdie voorwaardes afgelewer kan word.

13.1.    
Die klant kies as sy domicilium citandi et executandi
en die adres waar alle kennisgewings gelewer kan word die adres wat verskyn op
die ontvangsbewys/uitlaaibewys wat by die silo uitgereik word.

13.2.    
Die partye het die reg om die voormelde adresse te
verander met sewe werksdae  skriftelike
kennis aan die teenparty.

13.3.    
Kennisgewings moet per hand afgelewer word, of per faks
versend word, of  per e-pos versend word
of versend word met voorafbetaalde aangetekende pos.

13.4.    
‘n Kennisgewing ontvang na 16h00 op ʼn besigheidsdag sal
geag word ontvang te gewees het op die eersvolgende besigheidsdag.

13.5.    
Sodanige kennisgewing sal, tensy die teendeel bewys word,
geag word ontvang te gewees het indien:

13.5.1.       
Per hand gedurende gewone besigheidsure in ʼn korrek
geadresseerde koevert aan ʼn verantwoordelike persoon by die gekose adres
afgelewer, op die datum van aflewering;

13.5.2.       
Per faks of e-pos afgestuur, op die datum van afstuur
daarvan, waar dit gestuur word gedurende normale besigheidsure, of op die
eerste besigheidsdag nadat die gestuur is, waar dit buite besigheidsure gestuur
word; en

13.5.3.       
Per geregistreerde pos, vyf dae nadat dit per pos gedoen

14. REGSKOSTE:

Indien enige party regstappe
moet doen om hierdie voorwaardes af te dwing, sal die onsuksesvolle party die
ander party se koste betaal op ʼn skaal soos tussen prokureur-en-eie-kliënt.

15. GESKILLE EN ARBITRASIE:

15.1.    
Indien daar enige geskille tussen die partye bestaan oor
enige aangeleentheid wat verband hou met hierdie voorwaardes of die kansellasie
daarvan kan VKB in sy uitsluitlike diskresie besluit om sodanige geskil(le) te
laat bereg by wyse van arbitrasie of deur ‘n Hof met toepaslike
regsbevoegdheid.

15.2.    
Die oogmerk is dat die arbitrasie binne 21 dae afgehandel
moet word en informeel moet geskied.

15.3.    
Dit moet gehou word te Reitz en die partye is geregtig op
regsverteenwoordiging.  Indien die
arbitrasie nie op ʼn informele grondslag besleg kan word nie geld die bepalings
van die Arbitrasiewet  42 van 1965.

15.4.    
Die beslissing van die arbiter is finaal en bind die
partye tot die geskil en enige party mag dit ʼn bevel van die Hof laat maak.

15.5.    
Die bepalings vervat in hierdie klousule  15 doen geensins afbreuk aan die regte en
verpligtinge van die partye wat ingevolge die Nasionale Kredietwet 34 van 2005
(indien van toepassing) verleen is nie.

16. ALGEMEEN

16.1.    
By die berekening van enige aantal dae (genoem
besigheidsdae) word Saterdae, Sondae en amptelike openbare vakansiedae
uitgesluit.

16.2.    
VKB sal nie verantwoordelik wees vir enige vertraging in
die lewering van die produk of enige gedeelte daarvan indien dit teweeggebring
is deur enige Daad van God, aksie deur die Regering, staking, ontploffing,
vloede, oproer, oorlog, ongeluk, embargo, wetgewing, burgerlike opstand, onrus
of enige ander oorsaak of gebeurlikheid buite VKB se beheer, nie.  Die klant sal nie enige eis teen die VKB kan
instel vir die vertraging of nie-lewering ingevolge hierdie klousule nie.

16.3.    
Hierdie voorwaardes bevat die hele ooreenkoms tussen die
partye en geen terme, voorwaardes, wysigings, afwykings, veranderings of
gemeenskaplike kansellasie sal geldig wees nie tensy dit op skrif gestel en
deur beide partye onderteken is.

17. ERKENNINGS

Die klant erken dat hy bewus is van die inhoud van
hierdie voorwaardes en kennis dra daarvan dat dit die aanspreeklikheid van VKB
beperk; risiko en aanspreeklikheid op die klant plaas; en vrywarings en
feitelike erkennings deur die klant bevat, welke aldus aanvaar word.

Bemarking van graan

VKB-graanbemarking is daarop ingestel om ’n omvattende diens aan produsente, graanhandelaars, meulenaars, veevoeraanlegte, internasionale handelaars en ander verwerkers te lewer. Hierdie diens, wat aan al VKB se kliënte se behoeftes voldoen, word gerugsteun deur effektiewe stelsels, prosedures en ‘n Safex-setel. .Die spesifieke fokusareas in hierdie uiters dinamiese omgewing, is die volgende:

• Produsent gefokusde produkte en strategieë met maksimering van sy/haar wins as oogmerk.  Hierdie produkte sluit die volgende in:
  • Vastepryskontrak
  • Vloerpryskontrak
  • Minimum/Maksimum kontrak
  • Geweegde gemiddelde vloerpryskontrak
  • Produsente beskermingsplan
  • Uitgestelde pryskontrak met vloer
  • Uitgestelde pryskontrak sonder vloer
  • Eie verskansing deur VKB se makelaarsdiens.
• Graanverkope aan ’n verskeidenheid van kliënte soos handelaars en meulenaars.  Dit word gedoen deur die lewering van die onderstaande dienste:
  • Ex-silo aankope
  • Gelewerde pryse
  • Vooruitgeprysde kontrakte
  • Prysrisikobestuur
• 'n SAFEX-termynbeurs- makelaarsdiens gelewer deur kundiges wat  wat spesialiseer in die verhandeling van termynkontrakte en opsies wat op die JSE verhandel word.

Navrae

Graanhandelaars (Produsente)

Ruan Erasmus Tel: 058 863 8280 Sel: 083 384 1863
Robert Steynberg Tel: 058 863 8237 Sel: 082 384 1863
Hermann Verwey Tel: 058 863 8380 Sel: 071 688 1900
Jandré Potgieter Tel: 058 863 8507 Sel: 072 862 1738
Gustav Nel Tel: 058 863 8305 Sel: 072 384 0115

Graankopers (Afnemers)

Phillip van Vuuren
Tel: 058 863 8328
Sel: 083 516 5611